Act 25 | MCQ | STEP | Pesitasiho huni kwai roe hi'eme vea no'opisu pa'arejume hu Sesaria rene Jerusaremi va'ana.

Acts 25

Porura Ea Natohwiji Ka'iro Jarima 'Waramajina

1 Pesitasiho huni kwai roe hi'eme vea no'opisu pa'arejume hu Sesaria rene Jerusaremi va'ana. 2 'Ejume pirisiti mama'inijija 'ee Jua urani'inijija Poru namahareja 'ejaha hu 'waravara. 3 'Ene pu ea Natohwa kajaho 'ejahae ijá 'wava A nú ni'ajúhareje a va'ika'i Poru ranava Jerusaremi roe nú 'otua ve'avara 'wavara kaivo pu vwihajajaho hu ro'amajaho pu 'unama toi 'anaa kwahuna vwihajara. 4 'Ejume Pesitasi eha vene ijá 'iama Poruho Sesaria'i tipura ranavu'e hinuna'omo hu mai'o túna'i vuhuna. 5 'Enakúne joni ea mama'ina irechamie nú pu'úmo va'e heje ea kajara sisea venana he'avajaho ja iji'a hu apene nuni nini 'otua vetihunakúnina 'iamana. 6 'E'ikaivo hu na'ia ija ropune no'opisuna ho ironu ronu raki ijí pu pu'úmo hinarena iji'a kú'o Sesaria va'ana. 'Enarena hu nenana'omo sú'u 'urine va'e 'otua vejuri sei hi'i kaivo Poruho 'umejume pu aheme roajivara. 7 'Ejumakavi'i Jua ka'ene Jerusaremi rena roajivajipo huni rori nami'ika'i apene ira'ata kajino namahara. 'Enakaivo pura Poru namahajaho mai'o nimaa parenana. 8 'Ejume Porura eha vene ijá 'iama Na niho'o sisea pavejuta. Jua puni tamana ho Temiporu vajina ho ea natohwa ka'ene Sisa ho na niho'o sise'i pa'ahiuta 'iamana. 9 'Enakaivo Pesitasira Jua teamana'avarono hu eha vene Poru ijá 'wama A ura Jerusaremi va'e nuni una'i 'otua vehuna ura renao? 'wamana. 10 'Enakaivo Poruho ijá 'wama Na Sisa oni una'i 'otu vetihuna. Ijihuni maijaho na Jua puni unenu'u pina sisea pavejujaho a nihenu. 11 Na unenu'u pina sisea vejuta re'ipisa nijina'omo na 'anie kwahuna parare'eju kaivo vu'a ka'ene pura na 'otua vetihuna nimaa pa'ana re'amajaho ea pina na areri paapenie mihuna. 'Ena'omo na Sisa 'warave hura nuni 'otuijaho hehuna 'wamana. 12 'Ejume Pesitasira hine kanisoru pu'úmo 'wamuva'o ijá 'wama A ura Sisara oni 'otua hehuna re'amajaho a Sisa oni va'amana 'wamana.

Porura Akuripa'o Penisi Puni Una'i Va'ajina

13 Vea 'aho'a pa'are'eme Kini Akuripa'o Penisi'o Pesitasi 'ajo'i 'ahiume roajivara. 14 'Ejumakame pu ijino na'ia mapoka hi'eme Pesitasira Poru oni vu'ijaho kiniji ijá 'wama Ea pina Pirikisira hinajiri tipurai ranavume hinana. 15 'Ena'omo na Jerusaremi va'ume ea ka'ene pirisiti mama'ina 'ee Jua puni ea mama'inapo nara ea kaji ape mihakame 'otua vene nama'irono 'warivara. 16 'Ejume na ijá 'iavo Romu opuni tamana nú ea majikari pairechamiura kaivo ea ka'ene varapa rukinijihi puni vu'a hene 'ee ea ka'ene pu namahu jihipuni vu'a henare'e ijí tipurai irechamiura. 17 'Ejumakame ijihuna'e pu nianaa ro ikino ahuvara. 'Ejume na patetavuta kaivo ijihuni sú'uhijino na va'e 'otua vejuri ruhijino hi'ika'i pu 'waravume hu ahema roara. 18 Eaka hu 'otui ranavajipo 'urine nami'ika'i namahara kaivo sisea ka'ene nara vwihaju ja'ina pu panamahara. 19 'Enakaivo pu vu'a 'aho'a pura ichá'ina'e nimaa rojuji rone 'wame 'ee Ea pina kwavi'ina ka'ene Jesuho Porura ijino mai'o hinu 'iavume panimaa vetiara. 20 'Enakaivo ijá vejumakame nara 'unama ka'ene 'warahunijaho puruva rejume na roe apoma hejuta. Hu Jerusaremi va'e 'otua ikija kú'o ve'ena ho pa'aji he'irono apovuta. 21 'Enakaivo Poru ura renajaho hu Sisa oni nini 'otua ve'i 'wimana. 'Eju'e huni vwiha ijí he'irono hiji'i ranavu'e hinuna'omo na ranave Sisa oni vahuna 'wamana. 22 Akuripara Pesitasiho ijá 'wama Na ura ea kajihuni vu'a he'i 'ahiu 'wamana. 'Ejume Pesitasira ijá 'wama A niari he'ena 'wamana. 23 'Ejume nenana'omo sú'u 'urine Akuripaho no'o Penisi'i va'e 'otua vejuri ruhijino va'iro va'ajaho ea 'ajorame kehi kehi 'otua asúki va'ana. 'E'eme sorutia puni natohwijija 'ee ea mama'ina ka'ene ara kaji orijija pu pu'úmo ijí ahuma aruma va'umakivi'i Pesitasira 'waravume pu Poruho ahema puni roara. 24 'Ejume Pesitasira Akuripaho 'ee ea 'aho'a ka'ene pu pu'úmo hija kajija ijá 'iama Ea ka'ene nú pu'úmo hijukije Jua ka'ene Jerusaremi hine 'ee iki hijujipo eakaho apene nuni una'i 'otua vetiara. 'Enareja pu ajira ijá 'umeja Eakaho 'anaa kwahuna! 'umejara. 25 'Enakaivo na kavujaho hura unenu'u pina ve'ira'omo hura kwahuni 'unamijaho na pakavuta. 'Enakaivo hu ori'ini Sisa 'warave huni vu'a hehuna 'wimana. Ijihuni hahi nara hu ranave vahunijaho 'waravu. 26 'Enakaivo na mai'o huni vu'a pini samaumai rejakame nara venareje nuni ea natohwijihuni ranava vahunijaho papiunavuta. 'Enajihuna'e nara eakaho ja ea mapoka ikehipuni una'i apena routa kaivo kini Akuripa na nimaa a naja'irono apena routa. 'Enakúne jara henu va'o nara vu'aka maa ka'ene veja vahunijaho sama kavakame na veuta. 27 Nara tipurearu ranave va'eje vu'a maa ka'ene hu 'otua vetiajihuni maa paranave hu hu'úmo va'amajaho pamarahuna.